مديرك قال فكرتك باسمه؟ إزاي تاخد حقك من غير ما تخسره
إنك تقدم فكرة وتلاقيها بتتعرض باسم حد تاني موقف من أكتر المواقف اللي بتوجع في الشغل وجعه مش بس إنك اتضايقت ساعتها لكن لان التقدير جزء أساسي من علاقتك بشغلك: أبحاث Gallup لقت إن الموظفين اللي مش حاسين إنهم بياخدوا تقدير كفاية احتمال إنهم يقولوا إنهم هيسيبوا الشغل خلال سنة بيبقى الضعف يعني الموضوع أكبر من إحساس عابر، وبيأثر على الحماس والانتماء وحتى قرار إنك تكمل.
قبل ما تتصرف محتاج تفهم إيه اللي بيحصل فعلًا.
مش كل اللي بياخد فكرتك بيبقى قاصد
العلم بيقول إن جزء كبير من الموقف ده بيحصل من غير نية:
١. المخ بيفتكر الفكرة وبينسى صاحبها
في تجربة مشهورة لـ Brown & Murphy سنة 1989، مجموعات صغيرة عملت brainstorming، وبعدها كل واحد كتب الأفكار اللي هو قالها. حوالي ٧٥٪ من المشاركين نسبوا لنفسهم فكرة قالها حد تاني، وهم مش واخدين بالهم الظاهرة دي اسمها Cryptomnesia: المخ بيحتفظ بمحتوى الفكرة أكتر بكتير من مصدرها، وبعد كام يوم ممكن الفكرة تحس إنها طالعة منك إنت.
٢. طبيعة الدور
جزء من شغل المدير إنه يعرض شغل الفريق قدام الإدارة. ساعات بيقول "أنا" وهو يقصد "إحنا"، وساعات أسلوب العرض نفسه بيمسح أسماء أصحاب الأفكار.
٣. وأحيانًا بيكون قاصد فعلًا
ده وارد بس مش هو الاحتمال الوحيد. عشان كده أول رد فعل لازم يحمي حقك من غير ما يتهم حد لو كان سهو، الرد ده هيصلحه ولو كان مقصود هيبان مع الوقت.
الشغل اللي مش باين… مش بيتحسب
في دراسة لـ Heilman & Haynes سنة 2005، لما المقيّمين كانوا شايفين نتيجة الفريق بس أعضاء معينين في الفريق خدوا تقدير أقل بكتير على نفس النجاح ولما ظهرت مساهمة كل فرد بوضوح الفجوة دي اختفت تقريبًا.
الدرس هنا: الحل مش إنك تتخانق على كل فكرة الحل إن مساهمتك تبقى واضحة ومكتوبة ومنسوبة ليك من الأول.
تعمل إيه؟ خطوات مبنية على اللي فات
في نفس الاجتماع: وضّح المصدر من غير اتهام
جملة هادية زي:
"مبسوط إن الفكرة عجبتكم. كنت بعتها يوم الأحد، وعندي تفاصيل التنفيذ لو تحبوا."
بالجملة دي مصدر الفكرة بقى معروف للكل، ومديرك ما اتحطش في موقف دفاعي، وإنت ظهرت كصاحب الفكرة وكمان صاحب التنفيذ.
بعد الاجتماع: كلمه لوحدكم وافترض حسن النية
بما إن نسيان مصدر الفكرة شائع جدًا، ابدأ على إنه احتمال يكون نسي:
"حابب لما أفكاري تتعرض، اسمي يبقى عليها. ده مهم ليا في التقييم والتطور."
وراقب رد فعله: اعتذار وتصحيح غير التقليل أو التجاهل، وده هيقولك كتير.
من النهارده: خلّي مساهمتك مستحيل تضيع
ابعت أفكارك مكتوبة وبتاريخ (إيميل أو رسالة واضحة). الكتابة بتعالج نسيان المصدر قبل ما يحصل.
اطلب مسؤوليات واضحة في المشاريع المشتركة، عشان مساهمتك تبقى منفصلة وظاهرة.
اعرض أفكارك بنفسك في الاجتماعات لما تقدر، أو اطلب إنك تقدم الجزء بتاعك.
لو الموقف اتكرر رغم كل ده
مرة ممكن تبقى سهو، لكن التكرار بعد ما وضّحت بيبقى نمط، والنمط ده محتاج تتعامل معاه على مستوى تاني: مين لازم يشوف شغلك، وإزاي تبني علاقات وظهور خارج دايرة مديرك المباشر.
لو الموقف ده بيتكرر معاك ومحتاج تفكر فيه مع حد، جلسات Career & Workplace Coaching معمولة لده احجز من خلال: alaaelemam.com/sessions